Kryetarja e Komisionit Hetimor për inceneratorët ka takuar sot kreun e SPAK Arben Kraja.

Në një deklaratë për mediat pas takimit Tabaku theksoi se nuk ka asnjë cënim të kompetencave apo mbivendosje në hetimet e komisionit, duke shtuar se do të vihen dokumente në dispozicion të SPAK-ut.

Tabaku: Ne do të bëjmë atë për të cilën parlamenti na ka mandatuar, për të sjellë këtu dokumentet zyrtare që janë pjesë e hetimit. Të tjera do duhet t’i luajë SPAK.

Ju siguroj se deri më sot nuk ka asnjë mbivendosje të punës së komisionit hetimor, nuk ka asnjë cenim të punës sonë, përkundrazi po e mbështesim SPAK, duke bërë provat transparente. E sigurova SPAK se do të vendosim në dispozicion dokumentet. Takimi u kërkua nga unë.

Kujtojmë se prej javësh të Komisionin Hetimor për Inceneratorët ka nisur marrja në pyetje e dëshmitarëve për koncensionet e 3 inceneratorëve.

Të parët që janë thirrur janë tre administratorët e inceneratorëve të Tiranës, Fierit dhe Elbasanit. “Shteti ka tenderuar para për inceneratorët që nuk ekzistojnë”, kjo ka qenë deklarata e përsëritur nga Kryetarja e komisionit Hetimor Jorida Tabaku.

Prcocesi i hetimit përfundon me datë 25 shkurt, dhe dëshmitarët do të thirren të ndarë në dy grupe.

Nga dëshmitarët që do të thirren janë ish-ministri Lefter Koka i cili aktualisht ndodhet në qeli, kryeministri Rama me zv. Kryeministrin Ahmetaj, kryebashkiaku i Tiranës Erion Veliaj, gazetarë dhe administrator të inceneratorëve në 3 qytetet: Elbasan, Fier, Tiranë.