Kryeministri Edi Rama i ka bërë thirrje diasporës shqiptare në Greqi të mos e lënë për momentin e fundit dërgimin e zarfeve me votat për zgjedhjet. Ai theksoi se 11 maji është një moment historik dhe kërkoi nga ata që jetojnë në ishuj që të dërgojnë zarfin brenda 24 orëve të fundit, ndërsa për ata në Athinë dhe Selanik, apeloi për një veprim të ngjashëm. Rama theksoi se kjo votë ka rëndësi të madhe për të ardhmen e Shqipërisë, duke lidhur atë me hapjen e mundësive për pensionet e shqiptarëve dhe ecurinë e vendit drejt Bashkimit Europian.

“Ju lutem, mos e lini për në momentin e fundit. Ju lutem atyre që janë në ishuj, këto janë 24 orët e fundit për ta sepse ndryshe nuk arrihet dot transporti i zarfeve nga ishujt në afatin e caktuar.
Ju lutem atyre që janë në Athinë, Selanik dhe në gjithë Greqinë në gadishull, pra që nuk janë në ishuj të bëjnë të njëjtën gjë.
Ju lutem sepse ky është një takim me historinë dhe mbi të gjitha kjo votë për ju që jeni në Greqi dhe që jeni të regjistruar është kaq konkrete dhe është kaq e lidhur me diçka shumë konkrete duke filluar nga hapja e një rruge alternative për pensionet tuaja.

Ju lutem, zarfin mbrapsht drejt Tiranës me 5-sën për Shqipërinë me Be-në, në Europë, për Shqipërinë e re europiane, për shpresën europiane dhe amanetin europian të shqiptarëve dhe kurrsesi për një politikan të lashtë, të dëshpëruar, të pashpresë dhe tanimë edhe krejtësisht të përçartur”, theksoi ai.