Në Afganistan, Talibanët kanë miratuar një dekret të ri që përforcon kufizimet ndaj grave, duke ndaluar leximin e Kuranit me zë të lartë në publik, edhe kur janë vetëm në prani të grave të tjera. Ministri për Përhapjen e Virtytit dhe Parandalimin e Veseve, Mohammad Khalid Hanafi, deklaroi se zëri i gruas konsiderohet “awrah” — një term që nënkupton diçka që duhet të mbulohet dhe nuk duhet dëgjuar publikisht.

Dekreti i ri ka ngjallur shqetësime tek organizatat humanitare dhe gratë afgane, të cilat frikësohen se masat e fundit do të reduktojnë edhe më shumë praninë e grave në jetën publike. “Ky urdhër mund të çojë në kufizime edhe në bisedat personale midis grave,” tha një infermiere nga Herati për Independent, duke shtuar se punonjëset e shëndetësisë tashmë përballen me vështirësi në komunikimin me të afërmit meshkuj.

Ky vendim vjen pas një sërë ligjesh të fundit që detyrojnë gratë të mbulojnë trupin e fytyrën në publik dhe që ndalojnë arsimimin e tyre. Reagimi në mediat sociale ka qenë i ashpër; gazetarja Lina Rozbih bëri thirrje për mbështetje ndaj grave afgane, ndërsa ish-diplomatja Nazifa Haqpal e përshkroi situatën si një nivel ekstrem kontrolli dhe irracionaliteti.