Ministri i Brendshëm, Taulant Balla, ka vazhduar të kryejë detyrat e tij edhe në ditën e fundit në këtë post. Pas inspektimit të situatës së zjarreve në Shëngjin, Balla ka udhëtuar drejt pikës së kalimit kufitar në Qafë Thanë.

Në një njoftim nga zyra e shtypit të ministrisë, Balla ka bërë me dije se ka dhënë porosi për një regjim të lehtësuar në pikat kufitare. Ai ka nënvizuar rëndësinë e mbajtjes së kontakteve me homologët grekë për rritjen e numrit të sporteleve në pikat kufitare me Greqinë.

“Fluksi në Pikat e Kalimit Kufitar: Ministri i Brendshëm nga Qafë Thanë, në Pogradec, jep porosi për kalim në regjim të lehtësuar. Sa i përket pikave të kalimit me Greqinë, të mbahet kontakt me palën greke për rritjen e numrit të sporteleve”, thuhet në njoftim.

E marta shënon ditën e fundit të Ballës në drejtimin e Ministrisë së Brendshme. Pas mbledhjes së parlamentit në orën 17:00, Balla pritet të emërohet si ministër për Marrëdhëniet e Shtetit me Parlament. Drejtimin e Ministrisë së Brendshme pritet ta marrë Ervin Hoxha.