Ministrja e Bujqësisë, Frida Krifca ka reaguar me të qeshura ndaj pyetjes së bërë lidhur me pretendimin se kjo e fundit kishte propozuar që fermerët të mbillnin grurë në mars.

Krifca tha se kurrë nuk e kishte bërë një deklaratë të tillë dhe se edhe nëse ajo vetë do të “çmendej”, pjesëtarët e ekipit të saj nuk do e kishin lënë të thonte diçka të tillë.

Pyetje: Në rrjet qarkullon një deklaratë e juaja ku keni thënë se mund të mbjellim grurë në mars. Keni një deklaratë për këtë?

Ministrja e Bujqësisë, Frida Krifca: Nëse e gjen në deklaratë timen në media të sfidoj ta sjellësh këtu. Nëse unë do çmendesha unë, nuk do më linte ekipi im ta thoja një gjë të tillë.

Ministrja foli më tej edhe lidhur me situatën e produkteve bujqësore në vend ku tha se nevojat mund të mbuloheshin deri në 100% sa i përket produkteve të shportës.

Krifca: Një gamë e produkteve të shportës prodhohen në vend, dhe ne mund të mbulojmë nevojat e vendit 100%, do vijojmë bashkëpunimin ekonomik me vendet e tjera.

Jemi në komunikim me aktorët e tregut, situata është e luhatshme por duke qenë në partneritet me ta, ne do kemi mundësinë të kuptojmë dhe nevojat që do duhet të adresojmë. Jemi pjesë e komunitetit të menaxhimit të krizave për vendet e BE dhe ato që aspirojnë të jenë pjesë.
Jemi në krye të punës për të monitoruar dhe për të kuptuar se sa e mundur është krijimi i tregjeve të reja.