Pas Shqipërisë, Kosova po përballet gjithashtu me rritjen e atentateve dhe të shtënave me armë. Të paktën dy persona janë plagosur të enjten në Prishtinë, pas një sulmi me armë zjarri që ndodhi rreth orës 16:00 në rrugën “Mon Balaj”, konfirmoi Policia e Kosovës.

Të plagosurit janë transportuar menjëherë në Qendrën Klinike Universitare për trajtim mjekësor. Zëdhënësi i Policisë, Agron Borovci, njoftoi se autoritetet janë mobilizuar për të hetuar ngjarjen dhe për të zbardhur shkaqet e këtij incidenti, të cilat ende mbeten të paqarta.

Një person është arrestuar dhe një tjetër është shpallur në kërkim. Grupi hetimor po punon për të zbuluar rrethanat e plotë të ngjarjes.