Tiranë – Një ngjarje e rëndë u regjistrua mbrëmjen e kësaj të mërkure në zonën e njohur si “Diga e Liqenit”, ku rreth orës 20:00 janë dëgjuar të shtëna me armë zjarri.

Sipas burimeve të para, një telefonatë alarmuese mbërriti në sallën operative të Policisë së Shtetit, duke raportuar për të shtëna në zonë. Efektivët reaguan menjëherë dhe mbërritën në vendngjarje, ku dyshohet se konflikti ka ndodhur brenda një restoranti të njohur, “Zgara Korçare”.

Burime paraprake bëjnë me dije se një përplasje fizike mes shtatë personave ka agravuar deri në përdorimin e armës së zjarrit nga njëri prej të përfshirëve. Një person është plagosur dhe është dërguar me urgjencë në një spital privat për ndihmë mjekësore.

Policia ka nisur hetimet për të zbardhur rrethanat e sakta të ngjarjes dhe për të identifikuar autorët e përfshirë. Deri më tani nuk janë bërë të ditura identitetet e personave të përfshirë në konflikt.

Grupet hetimore ndodhen në vendin e ngjarjes, ku po mblidhen prova materiale dhe po merren dëshmitë e dëshmitarëve okularë. Policia ka rrethuar zonën dhe ka nisur një operacion për kapjen e autorit të dyshuar.