Sekretari i përgjithshëm i Partisë së Lirisë, Tedi Blushi, zhvilloi sot një takim me Shtabin Drejtues të Njësisë nr. 5 në Tiranë, në kuadër të riorganizimit të strukturave për zgjedhjet e vitit 2025. Blushi theksoi se Partia e Lirisë ka nisur takimet derë më derë për të mobilizuar mbështetje për “fitoren e padiskutuar të opozitës në 2025”. Ai falënderoi të gjithë mbështetësit dhe strukturat për përkrahjen në këto ditë të vështira, jo vetëm për opozitën, por për të gjithë vendin.
Takimi u zhvillua në një ditë që shënon 35-vjetorin e rrëzimit të Murit të Berlinit, por Blushi theksoi se Shqipërinë tani e ndan një tjetër “mur” – atë të Narkoregjimit të instaluar nga Edi Rama, që sipas tij, është bërë një armik i lirive, të drejtave dhe dinjitetit njerëzor. Ai theksoi se ky regjim është përgjegjës për largimin masiv të qytetarëve nga vendi.
Blushi vazhdoi duke folur për gjendjen e Partisë së Lirisë, duke e cilësuar atë si një forcë politike në gjendje lufte me “Narkoregjimin” dhe përmendi rrëmbimin e Presidentit të Partisë së Lirisë, Ilir Meta, duke e quajtur këtë një akt terrorist dhe kriminal. Sipas tij, ky rrëmbim ka për qëllim jo vetëm izolimin e Metës, por edhe përpjekjen për të “rrëmbyer” Partinë e Lirisë. “Do të dështojnë, sepse Partia e Lirisë është partia e patriotëve dhe nuk do të bëhet kurrë partia e tradhtisë”, tha Blushi.
Sekretari i Partisë së Lirisë kërkoi përshkallëzim të angazhimit qytetar dhe opozitar në terren, duke kujtuar se qindra mijëra anëtarë janë gati të paguajnë çdo çmim për të mbrojtur forcën politike dhe betejën për çlirimin e vendit nga “Narkoregjimi”.
Blushi gjithashtu përmendi dëmet e mëdha që partia ka pësuar për shkak të “aktit skandaloz” të djegies së 19 mandateve, ndikimin e nepotizmit dhe përpjekjet për të marrë peng ish-drejtuesit e partisë nga SPAK dhe regjimi. Ai e akuzoi kreun e SPAK, Altin Dumani, se është vënë në shërbim të Narkoregjimit.
Në fund, Blushi renditi pesë prioritetet kryesore të politikave të Partisë së Lirisë, që përfshijnë: ndalimin e shpopullimit, rritjen e pensioneve dhe pagave, arsimin, bujqësinë dhe energjinë.
