Sekretari i Përgjithshëm i Partisë së Lirisë, njëherësh deputeti Tedi Blushi, ka reaguar pas zjarrit të rënë mbrëmjen e sotme në Tregun e rrobave te “5 Maji” në Tiranë, duke e cilësuar ngjarjen si një tjetër tregues të asaj që ai e quajti masakër urbane të kryer nga Bashkia e Tiranës ndër vite.

Në një prononcim nga vendngjarja, Blushi u shpreh se situata e krijuar është pasojë e drejtpërdrejtë e politikave urbane të ndjekura nga bashkia, duke ngritur edhe dyshime për shkaqet e zjarrit.

“Zjarri i mbrëmjes së sotme në Tregun e rrobave është një dëshmi e qartë e masakrës urbane që është bërë nga Bashkia e Tiranës në këto vite. Uroj që të mos jetë i qëllimshëm, pasi janë të njëjtat skena kriminale që përdorin biznesmenë të ndryshëm për t’i hapur rrugë ndërtimeve”, u shpreh Tedi Blushi.

Deklarata e deputetit vjen në një kohë kur zona e “5 Majit” ka qenë shpesh në qendër të debatit publik për shembje, zjarre dhe projekte ndërtimi, ndërsa banorët dhe tregtarët kanë ngritur vazhdimisht shqetësime për sigurinë dhe të ardhmen e pronave të tyre. Autoritetet ende nuk kanë dhënë një njoftim zyrtar për shkaqet e zjarrit.