Në Vlorë po zhvillohet një ngjarje e pazakontë dhe kontroverse, “Teknofestival”, një festë masive me muzikë elektro që ka tërhequr qindra të rinj nga Italia, Franca, Gjermania, Çekia, dhe vende të tjera. Festimi po zhvillohet pranë plazhit të Delisufit, në Njësinë Administrative Novoselë, Bashkia Vlorë, dhe duket se pjesëmarrësit janë të papenguar nga autoritetet.
Me një skenë të ngritur në një zonë të izoluar, ku bokset e mëdha të muzikës mbushin ajrin me ritme të forta elektro, të rinjtë kanë ndërtuar një komunitet të përkohshëm, duke shijuar festën larg syrit të publikut dhe mediave, të cilat nuk lejohen të marrin pjesë. Pjesëmarrësit, të cilët janë organizuar përmes rrjeteve sociale, vijnë nga vende të ndryshme të Evropës për të përjetuar këtë eksperiencë unike.
“Unë jam nga Franca. Kam qenë në Shqipëri për dy javë për pushime, por pashë në internet këtë festival dhe vendosa të ndaloja. Do ketë muzikë elektro, që më pëlqen shumë,” tha një pjesëmarrëse nga Franca. Të tjerë kanë ardhur nga Italia, Gjermania, Spanja dhe vende të tjera, duke përmendur se kanë përjetuar të njëjtat festivale në shtete të ndryshme dhe kanë ardhur në Shqipëri për të vazhduar traditën.
Report Tv arriti të futet brenda festivalit dhe regjistroi pamje të festës së çmendur, ku alkooli dhe lëndët narkotike janë pjesë e pandarë e atmosferës. Pjesëmarrësit shprehën entuziazmin e tyre për muzikën dhe ambientin, ndërsa jashtë kamerave pranuan se kjo nuk është hera e parë që organizojnë festa të tilla, duke përmendur edhe ngjarje të mëparshme në vende si Porto Novo, Vila Bashtovë, tunelin e Baldushkut, dhe Kavajë, madje edhe gjatë pandemisë COVID-19.
Mbi 100 kampera kanë mbërritur nga vende të ndryshme të Evropës, dhe shumë të tjerë pritet të mbërrijnë në ditët në vijim. Ata do të qëndrojnë për disa ditë në zonën e plazhit të Delisufit, një vend i largët nga qendrat e banuara dhe rreth 40 km larg qytetit të Vlorës. Megjithëse festivali ka ngjallur shqetësim për shkak të natyrës së tij të shfrenuar, autoritetet duket se janë të dorëzuara përballë kësaj ngjarjeje të organizuar mirë.
