Më shumë se 100,000 njerëz marshuan këtë të shtunë në Londër në një demonstratë të organizuar nga aktivisti i ekstremit të djathtë Tommy Robinson. Tubimi, i quajtur “United the Kingdom”, sipas policisë britanike, tërhoqi rreth 110,000 persona.

Robinson, emri i vërtetë i të cilit është Stephen Yaxley-Lennon, e cilësoi marshimin si një “demonstrim për lirinë e fjalës” dhe tha se synonte të mbronte “trashëgiminë dhe kulturën britanike”.

Në krahun tjetër, një kundërprotestë e organizuar nga Stand Up to Racism me moton “Marsh Kundër Fashizmit” mblodhi rreth 5,000 pjesëmarrës.

“Mesazhi ynë është i qartë: nuk do të lejojmë që urrejtja të normalizohet,” tha një prej organizatorëve të kundërprotestës.

Përplasje dhe ndërhyrje e policisë

Rreth 1,000 oficerë policie ishin vendosur për të monitoruar marshimet dhe për të mbajtur të ndara dy grupet përmes një zone tampon.

Pas disa orësh të qeta, tensionet shpërthyen kur disa mbështetës të Robinson tentuan të thyenin barrierat e policisë dhe hodhën sende drejt kundërprotestuesve.

“Oficerët u detyruan të përdorin forcë për të parandaluar përshkallëzimin e situatës,” tha Policia Metropolitane, duke shtuar se të paktën nëntë persona u arrestuan. Autoritetet paralajmëruan se identifikimi i të tjerëve është në proces dhe se do të ndiqen penalisht.

Mesazhet e kundërta

Në marshimin e Robinson-it, shumë protestues mbanin pankarta me mbishkrime si “Ndalo anijet”, “Dërgoji në shtëpi” dhe “Mjaft më, shpëto fëmijët tanë”, ndërsa valëvitnin flamujt e Anglisë dhe Union Jack. Thirrjet më të shpeshta ishin “Duam vendin tonë të kthehet”.

Nga ana tjetër, kundërprotestuesit mbanin mesazhe si “Mirë se vini refugjatë” dhe “Shkatërro të djathtën ekstreme”, duke brohoritur: “Ngrihu, kundërsulmo!”

Një Britani e ndarë

Marshimet pasqyrojnë ndasitë e thella në shoqërinë britanike rreth politikave të migracionit, sidomos për kalimet e rrezikshme të Kanalit Anglez me gomone.

Megjithatë, edhe pse demonstrata e së shtunës ishte e madhe, ajo mbetet më e vogël në krahasim me tubimin pro-palestinez të nëntorit 2023, i cili tërhoqi mbi 300,000 pjesëmarrës.