“Kordonë policie para furrave të bukës, protesta dhe gjuhë urrejtjeje” – kështu e përshkruan situatën në Surdulica mediumi Radio Evropa e Lirë, pas një aksidenti trafiku me pasojë vdekjen e një qytetari.
Ngjarja ka nxitur tensione, pasi i dyshuari për aksidentin është një 20-vjeçar me kombësi shqiptare. Edhe pse ai është arrestuar dhe ndaj tij po zhvillohet hetim për vepër të rëndë kundër sigurisë së trafikut publik, në qytet janë organizuar protesta me thirrje për bojkotimin e furrave të bukës në pronësi të familjes së tij, si dhe mesazhe për largimin e familjes nga qyteti.
Sipas raportimeve, gjatë tubimeve janë parë pankarta me mbishkrimin “Drejtësi për Rastkon”, ndërsa policia ka vendosur kordonë sigurie pranë furrave për të parandaluar incidente. Në protesta janë dëgjuar edhe thirrje që janë interpretuar si gjuhë urrejtjeje, ndërsa disa organizata joqeveritare kanë reaguar duke dënuar shënjestrimin kolektiv mbi bazë etnike.
Ministri pa portofol në Qeverinë e Serbisë, Novica Tončev, i cili ishte anëtar i një grupi lokal në Viber ku u shpërndanë mesazhe për bojkot, ka deklaruar se protestat nuk kanë bazë kombëtare, por lidhen me pakënaqësinë për ngasjen e pamatur.
Nga ana tjetër, ministri për të Drejtat e Njeriut dhe të Pakicave, Demo Berisha, ka dënuar thirrjet për dëbim dhe ndëshkim kolektiv, duke theksuar se tragjedia nuk duhet të përdoret për përhapjen e urrejtjes. Reagime ka pasur edhe nga Komisionari për Mbrojtjen e Barazisë në Serbi, i cili ka paralajmëruar për rrezikun e përkeqësimit të marrëdhënieve ndëretnike.
Prokuroria në Vlladiçin Han ka njoftuar se i dyshuari posedonte patentë shoferi nga Kosova, e cila iu konfiskua menjëherë, ndërsa hetimet po vazhdojnë për të përcaktuar shpejtësinë e automjetit dhe rrethanat e plota të aksidentit. Autoritetet theksojnë se respektohet prezumimi i pafajësisë.
Ndërkohë, pavarësisht thirrjeve për bojkot, tri furrat në pronësi të familjes shqiptare vijojnë aktivitetin, ndërsa një pjesë e qytetarëve kanë shprehur publikisht kundërshtimin e tyre ndaj përndjekjes së një familjeje të tërë për veprën e dyshuar të një individi.
