Sipas raportimeve të Wall Street Journal, tensionet midis Shteteve të Bashkuara dhe Izraelit po intensifikohen. Zyrtarë amerikanë, në kushte anonimiteti, konfirmuan se Uashingtoni së shpejti do t’i dërgojë Izraelit bomba 500 paund (rreth 226 kilogramë), furnizimi i të cilave ishte pezulluar nga administrata Biden për të reduktuar viktimat civile në Rripin e Gazës.

Sipas burimeve, pajisjet janë tashmë duke u “dërguar” dhe pritet të mbërrijnë në javët e ardhshme. Ndërkohë, bombat më të rënda prej 2000 paund, pjesë e së njëjtës paketë të pezulluar majin e kaluar pas planeve të IDF për të pushtuar Rafahun, mbeten ende të bllokuara.

Para vendimit të Shtëpisë së Bardhë për të bllokuar furnizimet, Izraeli kishte dërguar tashmë një anije në Charleston për të mbledhur pajisjet. Në atë kohë, në qytetin në kufi me Egjiptin ndodheshin rreth një milion e gjysmë civilë. Qeveria e kryeministrit Benjamin Netanyahu nuk kishte zhvilluar një plan të besueshëm për të mbrojtur joluftëtarët gjatë operacioneve tokësore kundër Hamasit, të cilët kishin bastionin e fundit në Rafah.

“Shqetësimi ynë kryesor ishte dhe mbetet përdorimi i mundshëm i bombave prej 2000 paundësh në Rafah dhe gjetkë në Gaza,” tha një zyrtar amerikan për Wall Street Journal. Ndërkohë, një zëdhënës i Këshillit të Sigurisë Kombëtare shtoi se, përveç dërgesës së bombave 2000 paund që u pezullua dhe mbetet pezull, dërgesa e armëve vazhdon. Megjithatë, ai nuk pranoi të japë detaje për çdo dërgesë specifike.

Gjatë muajve të fundit, izraelitët kanë theksuar nevojën e tyre për bomba të rënda për të shkatërruar tunelet e përdorura nga Hamas.