Pas 4 ditësh protestash ARRSH është tërhequr nga vendimi duke hapur me dy sense rrugën e Rinasit.

Vendimi për ta bërë vetëm me një sens lëvizje, solli reagimin e banorëve të cilët kanë dalë në protestë prej 4 ditësh duke u shprehur se i penalizonte shumë ata, duke bërë kilometra të tëra e që rëndonte më shumë xhepat e tyre.

Ditën e djeshme në shenjë proteste ata nuk dërguan as fëmijët e tyre në shkollë, ndërsa rruga alternative që u kishte sugjeruar ARRSH ishte jo në kushte të mira ndërsa do të duhet të bënin edhe më shumë kilometra.

Duket se pas “kërcënimit” të banorëve se do të vazhdonin çdo ditë me protesta, ARRSH ka vendosur që të hapë me dy sense rrugën.

Njoftimi i ARRSH:

NJOFTIM‼️
Kthehet në gjendjen e mëparshme Rruga e Rinasit, qarkullimi do të vijojë me dy sense lëvizjeje deri në një zgjidhje përfundimtare me qëllim lehtësimin e trafikut në segmentin Qafë Kashar-Rrethrrotullimi i Rinasit-Ahmetaq.
📍Apel ynë për të gjithë drejtuesit e mjeteve që vijnë nga veriu të përdorin akset alternative për të mos rënduar trafikun në rrugën që të çon drejt aeroportit të Rinasit.
📍Udhëtarë/turistët që marrin fluturimet të marrin në konsideratë fluksin e lartë të mjeteve në këtë aks duke përllogaritur orarin e nisjes.