Një tjetër tërmet i fuqishëm ka goditur Qipron, në orët e para të së premtes, duke shënuar tërmetin e tretë brenda një jave. Lëkundja, me magnitudë 4.2 të shkallës Rihter, ka pasur epiqendrën 44 kilometra në juglindje të Larnakës, sipas të dhënave të Institutit Euro-Mesdhetar (EMSC).

Tërmeti, që ndodhi në orën 00:38, ka pasur një thellësi fokale prej 26 kilometrash. Lëkundjet janë ndjerë kryesisht në zonën e Larnakës, por nuk janë raportuar dëme materiale apo viktima nga autoritetet lokale.

Kjo ndodhi vjen pas dy tërmeteve të tjera që goditën vendin ditët e fundit, me magnitudë 5.0 dhe 4.5 të shkallës Rihter. Tërmeti i parë kishte epiqendrën në jug të Limasolit, ndërsa i dyti ndodhi në verilindje të Paphos.

Autoritetet dhe institucionet sizmologjike po ndjekin situatën nga afër, ndërsa banorët janë këshilluar të qëndrojnë vigjilentë për shkak të mundësisë së lëkundjeve pasuese. Sizmologët theksojnë se tërmetet në këtë rajon janë të zakonshme për shkak të aktiviteteve tektonike përgjatë zonës Mesdhetare.