Një qytetare nga Tirana ka kërkuar ndihmën e emisionit investigativ “Stop”, pasi thotë se është shantazhuar nga një i ri, me të cilin kishte nisur një bisedë në rrjetin social Instagram. Gruaja, e martuar dhe 26 vjeçe, rrëfen se komunikonte prej disa ditësh me një djalë që i ishte prezantuar si 21 vjeç.

Sipas dëshmisë së saj, pas shkëmbimit të disa mesazheve dhe një fotoje personale që ajo i kishte dërguar, djali filloi ta kërcënonte, duke i kërkuar foto dhe video intime, në të kundërt i tha se do t’ia publikonte imazhin në TikTok për ta ekspozuar publikisht.

Komunikimi mes tyre, i siguruar nga redaksia e emisionit “Stop”, tregon një gjuhë të ashpër presioni dhe manipulimi emocional. Ngjarja ka ngritur shqetësimin për abuzimet dhe shantazhet që ndodhin në rrjetet sociale, sidomos ndaj grave dhe vajzave që bien pre e mashtrimeve virtuale.

Redaksia e emisionit i ka bërë thirrje autoriteteve që të ndërhyjnë për të hetuar rastin dhe për të identifikuar autorin e shantazhit, ndërsa qytetarja është inkurajuar të paraqesë një kallëzim penal në polici për veprën penale të kanosjes dhe shantazhit me materiale komprometuese.

Rasti është një tjetër kujtesë se komunikimet në rrjetet sociale duhet të trajtohen me kujdes të veçantë dhe çdo tentativë për shantazh apo presion duhet raportuar menjëherë tek autoritetet përkatëse.