Një 24-vjeçar është arrestuar nga Policia e Tiranës pasi u kap në flagrancë duke tërhequr një pako të dërguar nga Shtetet e Bashkuara të Amerikës, që përmbante një sasi të konsiderueshme kanabisi me përqindje të lartë të përbërjes aktive THC. I riu i arrestuar është identifikuar si Franci Veizaj, banues në Tiranë.
Operacioni policor, i koduar “Destinacioni 5”, u zhvillua nga Seksioni për Hetimin e Narkotikëve në bashkëpunim me Forcën e Posaçme Operacionale të DVP Tiranë, Komisariatin e Policisë Rinas dhe Filialin Qendra Tranzite e Postës Shqiptare. Hetimet janë zhvilluar nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë dhe kanë përfshirë metoda proaktive për dokumentimin e aktivitetit kriminal.
Sipas njoftimit zyrtar, Veizaj u kap në një degë postare në momentin që po tërhiqte pakon me rreth 3.6 kilogramë lëndë narkotike, e dyshuar si kanabis me përqindje të lartë THC, që sipas policisë ka një vlerë tregu prej rreth 50 mijë euro.
Lënda narkotike ishte e ndarë në mënyrë profesionale dhe kishte për qëllim shpërndarjen në tregun vendas, duke shfrytëzuar shërbimet postare ndërkombëtare si kanal transporti përmes “rrugëve të qeta” dhe më pak të dyshuara.
Policia bën me dije se vijojnë hetimet për zbardhjen e plotë të rrjetit të përfshirë në këtë trafik ndërkombëtar, si dhe për identifikimin dhe arrestimin e bashkëpunëtorëve të tjerë të dyshuar.
