Një ngjarje e rëndë ka tronditur paraditen e sotme sistemin e drejtësisë në Tiranë, ku gjyqtari Astrit Kalaja është qëlluar me armë zjarri brenda sallës së gjyqit në Gjykatën e Apelit të Juridiksionit të Përgjithshëm.

Sipas informacioneve paraprake, gjyqtari Kalaja ka mbetur fillimisht i plagosur rëndë dhe është dërguar me urgjencë drejt Spitalit të Traumës, ku ka ndërruar jetë gjatë transportimit.

Ngjarja ka ndodhur gjatë një seance gjyqësore, duke shkaktuar panik dhe kaos mes të pranishmëve. Autori i të shtënave Gjon Shkëmbi është arrestuar menjëherë nga forcat e shumta të policisë që mbërritën në vendngjarje.

Burime nga policia bëjnë me dije se një person tjetër ka mbetur i plagosur, por identiteti i tij nuk është bërë ende publik.

Aktualisht, Grupi Hetimor po punon për të sqaruar motivet dhe rrethanat e ngjarjes që ka tronditur opinionin publik dhe sistemin gjyqësor në vend.

Ngjarja po zhvillohet në një nga institucionet më të larta të drejtësisë, çka e bën edhe më të rëndë aktin e dhunës që, sipas ekspertëve të sigurisë, tregon mungesë alarmante të masave mbrojtëse brenda institucioneve të drejtësisë.