Një zjarr ka rënë mbrëmjen e së mërkurës në bodrumin e Spitalit Psikiatrik në Tiranë, ku dyshohet se shkaku ka qenë një shkëndijë elektrike.

Policia e kryeqytetit njofton se nga zjarri janë shkaktuar vetëm dëme materiale, ndërsa nuk ka pasur rrezik për pacientët apo stafin mjekësor.

Në një deklaratë zyrtare, Qendra Spitalore Universitare “Nënë Tereza” (QSUT) sqaroi se situata është vlerësuar nga stafi mjekësor dhe ekipet teknike, duke garantuar vijimin normal të shërbimit.

“Aktualisht në ambientet e spitalit nuk ka asnjë rrezik për pacientët apo personelin dhe puna vijon pa asnjë pengesë. Autoritetet përkatëse janë njoftuar për të kryer verifikimet e nevojshme dhe për të siguruar që gjithçka është në parametra të sigurt”, thuhet në reagimin e QSUT.

Hetimet vijojnë për të përcaktuar shkaqet e sakta të incidentit.