Një ngjarje e rëndë ka tronditur mëngjesin e sotëm aeroportin Orio al Serio në Bergamo të Italisë, ku një burrë humbi jetën pasi u thith nga motori i një avioni që po përgatitej për nisje.
Sipas informacioneve paraprake, viktima nuk ishte as pasagjer dhe as punonjës i aeroportit. Ai kishte arritur me makinën e tij pranë zonës së aeroportit, ku në mënyrë të papritur hyri në pistë përmes një daljeje emergjente dhe filloi të vraponte drejt avionit Airbus A312, që ishte duke u përgatitur për nisje.
Ngjarja ndodhi shumë shpejt, duke bërë që autoritetet e sigurisë të mos kenë mundur ta ndalojnë në kohë. Fatkeqësisht, burri u thith nga motori i avionit, duke ndërruar jetë në vend.
Policia dhe prokuroria kanë nisur hetimet për të zbardhur rrethanat e incidentit dhe nuk përjashtojnë mundësinë që të ketë qenë një akt vetëvrasjeje.
Avioni ishte planifikuar të nisej drejt Asturias në veri të Spanjës. Për shkak të ngjarjes tragjike, aeroporti i Bergamos u mbyll për rreth një orë, duke ndërprerë përkohësisht fluturimet.
