Herat, Afganistan — 20 gusht 2025
Një aksident tragjik ka tronditur Afganistanin perëndimor, ku të paktën 73 persona, përfshirë 17 fëmijë, humbën jetën pasi një autobus me emigrantë afganë të deportuar nga Irani u përplas me një kamion dhe një motoçikletë në provincën Herat. Lajmi u konfirmua nga Ahmadullah Mottaqi, drejtor i informacionit dhe kulturës në provincë, për BBC Pashto.

Sipas autoriteteve, autobusi mori flakë menjëherë pas përplasjes dhe të gjithë pasagjerët që ndodheshin brenda humbën jetën. Viktima pati gjithashtu edhe në automjetet e tjera të përfshira në aksident.

“Autobusi ishte nisur drejt Kabulit dhe të gjithë pasagjerët ishin emigrantë të deportuar që kishin hipur në Islam Qala, pranë kufirit me Iranin”, – tha për AFP Mohammad Yousuf Saeedi, zëdhënësi i guvernatorit të Heratit.

Shpejtësia dhe neglizhenca, shkaqet kryesore

Policia lokale njoftoi se shpejtësia e tepërt dhe neglizhenca e shoferit të autobusit janë shkaqet kryesore të aksidentit. Autoritetet theksojnë se rrugët e dëmtuara, mungesa e sinjalistikës dhe zbatimi i dobët i rregullave të qarkullimit rrugor në Afganistan e bëjnë vendin një nga më të rrezikshmit për udhëtime.

Kriza e emigrantëve, sfondi i tragjedisë

Ngjarja ndodhi në një kohë kur Irani ka intensifikuar deportimin e afganëve pa dokumente. Pas tensioneve të fundit me Izraelin, autoritetet iraniane kanë kthyer me forcë qindra mijëra emigrantë, duke përmendur “shqetësime për sigurinë kombëtare”.

Sipas Agjencisë së OKB-së për Refugjatët (UNHCR), mbi 1.5 milion afganë janë larguar nga Irani që prej janarit 2025, shumë prej tyre familje që kishin jetuar në Iran për breza të tërë.

Ky aksident shënon një nga trageditë më të mëdha rrugore të viteve të fundit në Afganistan, duke nxjerrë në pah jo vetëm gjendjen e rëndë të infrastrukturës rrugore, por edhe krizën e thellë humanitare që po përjetojnë emigrantët afganë.