Një ngjarje e dhimbshme ka tronditur Azerbajxhanin, ku një vajzë vetëm 19-vjeçare, Lyaman Mammadli, i dha fund jetës pas presionit dhe kritikave të ashpra nga familja e burrit të saj për fustanin e nusërisë.

Sipas babait të saj, Murad Bayramov, e reja u akuzua se ishte “shumë zbulues” gjatë ceremonisë, pasi fustani i saj linte të zbuluara supet. Familjarët e dhëndrit, Elnur Mamedli, 33 vjeç, nisën një debat të ashpër në shtëpinë e prindërve të vajzës, duke e cilësuar pamjen e saj si “të turpshme dhe provokuese”.

“Dhëndri dhe prindërit e tij shkaktuan një sherr të madh për shkak të fustanit të saj. Vajza ime nuk mundi ta përballonte dhe i mori jetën vetes në oborrin e shtëpisë sonë,” tregoi babai me lot në sy. Ai shtoi se familja e burrit e kishte akuzuar të bijën për “turpërim të djalit dhe familjes së tyre”, ndërsa grindjet vazhduan edhe ditën pas martesës.

Ngjarja ka shkaktuar reagime të forta në rrjetet sociale, ku shumë përdorues e kanë dënuar presionin dhe paragjykimet ndaj vajzës, duke e cilësuar këtë si një shembull tragjik të dhunës psikologjike ndaj grave në emër të “nderit” familjar.

Ky rast rikthen në qendër debatet mbi rolin e presionit social dhe familjar mbi të drejtat dhe lirinë e grave në shoqëri.