Një ngjarje e rëndë është regjistruar mbrëmjen e sotme në qytetin bregdetar të Durrësit, ku një grua 65-vjeçare ka humbur jetën pasi ka rënë nga kati i tretë i banesës së saj.

Ngjarja ka ndodhur në lagjen 8, pranë Spitalit Rajonal të Durrësit. Sipas të dhënave paraprake, dyshohet se e moshuara ka rënë nga dritarja e tualetit, por ende nuk dihen me saktësi rrethanat e plota të incidentit tragjik.

Policia dhe grupi hetimor ndodhen në vendngjarje dhe po punojnë për të zbardhur shkaqet e rënies. Burime nga uniformat blu bëjnë me dije se 65-vjeçarja vuante nga probleme të shëndetit mendor, çka mund të ketë ndikuar në këtë ngjarje fatkeqe.

Trupi i pajetë është transportuar në morg për ekspertizë mjeko-ligjore, ndërsa dëshmitë e familjarëve pritet të ndihmojnë në zbardhjen e plotë të rastit.