Një ngjarje tronditëse ka ndodhur pasditen e së martës në qytetin e Elbasanit, ku një fëmijë 6-vjeçar është gjetur i pajetë buzë lumit Shkumbin, në lagjen “Çezme”.

Sipas Policisë, rreth orës 19:50 të datës 10 qershor 2025, një qytetare me inicialet D. A. ka raportuar humbjen e nipit të saj, duke thënë se fëmija nuk ishte parë për rreth 3 orë.

Menjëherë pas marrjes së njoftimit, shërbimet e Policisë kanë nisur kërkimet intensive në zonë. Rreth orës 21:30, trupi i pajetë i të miturit është gjetur pranë brigjeve të lumit, në afërsi të lagjes “Çezme”.

Nga këqyrja paraprake e trupit, nuk janë konstatuar shenja dhune, ndërsa dyshimet paraprake të hetuesve janë se fëmija është mbytur aksidentalisht.

Policia bën me dije se materialet procedurale janë referuar në Prokurorinë e Elbasanit, për vijimin e veprimeve hetimore dhe vlerësimin ligjor të rrethanave të ngjarjes