Një aksident tragjik ka ndodhur mëngjesin e së hënës në Dafnes, në zonën e Heraklionit të Greqisë, ku një punëtor 55-vjeçar shqiptar humbi jetën gjatë kryerjes së detyrës.

Sipas autoriteteve lokale, viktima u gjet pa shenja jete brenda një rezervuari të ujërave të zeza, i cili administrohet nga një kompani private kontraktuese. Ai kishte shkuar në vendngjarje së bashku me një koleg për të inspektuar nivelin e ujërave, që kishte kaluar kufirin e lejuar.

Në rrethana ende të paqarta, shqiptari është rrëzuar brenda rezervuarit. Kolegu i tij, i cili nuk e kishte parë për disa minuta, njoftoi menjëherë shërbimet e emergjencës. Zjarrfikësit mbërritën në vendngjarje dhe arritën të nxirrnin trupin, por fatkeqësisht 55-vjeçari kishte ndërruar jetë.

Burime pranë hetimit bëjnë me dije se po të ishte konstatuar në kohë rrëzimi i tij, ekzistonte mundësia që ai të shpëtonte. Megjithatë, kjo mbetet për t’u konfirmuar nga ekspertiza mjeko-ligjore dhe hetimi paraprak që po vijon për të sqaruar shkaqet dhe rrethanat e sakta të aksidentit.

Autoritetet greke po analizojnë gjithashtu nëse janë respektuar protokollet e sigurisë në punë nga kompania përgjegjëse. Ngjarja ka tronditur komunitetin lokal dhe ka ngritur shqetësime për sigurinë e punëtorëve, veçanërisht emigrantëve që punojnë në sektorë të rrezikshëm.