Të paktën 21 persona kanë humbur jetën dhe pesë të tjerë janë plagosur nga një shpërthim i fuqishëm në një fabrikë fishekzjarresh në shtetin veriperëndimor të Indisë, Gujarat.

Sipas autoriteteve, shpërthimi ishte aq i dhunshëm sa trupat e viktimave dhe mbeturinat e fabrikës u hodhën në një rreze të gjerë rreth ndërtesës, në qytetin e Disa.

“Shembja e çatisë si pasojë e shpërthimit ka shkaktuar një situatë katastrofike,” tha zëdhënësi i qeverisë së shtetit, Rikishes Patel, duke theksuar se fabrika operonte pa licencë.

“Pjesë të trupave u gjetën të shpërndara në një fermë që ndodhet 200-300 metra larg fabrikës,” deklaroi një zyrtar lokal.

Problemi i fabrikave ilegale në Indi

Fishekzjarret janë shumë të përdorura në Indi, veçanërisht në festivale, dasma dhe evente të ndryshme. Shumë fabrika operojnë ilegalisht, duke neglizhuar standardet e sigurisë, çka çon shpesh në tragjedi të tilla.

Në shkurt të vitit 2024, një shpërthim i ngjashëm në një fabrikë fishekzjarresh në Madhya Pradesh shkaktoi 11 viktima, ndërsa shtatë muaj më vonë, një tjetër shpërthim në Uttar Pradesh mori jetën e pesë personave.

Autoritetet indiane kanë nisur hetimet për zbardhjen e ngjarjes dhe për të identifikuar përgjegjësit e fabrikës që operonte jashtë ligjit.