Një aksident i rëndë rrugor ka tronditur komunitetin shqiptar në Itali. Manuel Leti, vetëm 16 vjeç, student i informatikës dhe i lindur në Itali nga prindër shqiptarë, humbi jetën pasditen e djeshme në rrugën “4 Nëntori” të Artognes, në provincën e Brescia-s.

I riu po udhëtonte me motorin e tij KTM Duke 125, kur rreth orës 14:30 u përplas me një Audi që drejtohej nga një 44-vjeçar në kryqëzimin me rrugën “Caduti della Resistenza”. Përplasja me automjetin ishte e lehtë, por humbja e kontrollit mbi motorin e çoi Manuelin drejt një shtylle ndriçimi.

Goditja rezultoi fatale, pavarësisht se ai mbante helmetë. Plagët e marra në gjoks dhe bark ishin të rënda, duke shkaktuar vdekjen e menjëhershme. Një mik i tij, që po udhëtonte me një motor tjetër, dëshmoi tragjedinë pa mundur të bëjë asgjë për ta shpëtuar.

Menjëherë në vendngjarje mbërritën ambulanca dhe një helikopter emergjence, por mjekët nuk mundën të bënin asgjë tjetër veçse të konfirmonin vdekjen e adoleshentit.

Ngjarja ka tronditur thellë komunitetin lokal. Kryetarja e Bashkisë së Artognes, Barbara Bonicelli, e cilësoi tragjedinë “të papranueshme”, duke bërë thirrje për më shumë kujdes në rrugë. Ndërsa kryetari i Pian Camuno, Giorgio Ramazzini, shprehu ngushëllime për familjen shqiptare, të cilën e quajti “të respektuar dhe shembullore”, duke shtuar: “Është e vështirë të gjesh fjalë për një dhimbje të tillë.”