TUORO SUL TRASIMENO (Itali) – Një ngjarje e rëndë dhe e dhimbshme ka tronditur komunitetin shqiptar në Itali. Edmond Gjoci, 39 vjeç, banues në Tuoro sul Trasimeno dhe baba i një vajze të vogël, u përplas për vdekje në mëngjesin e sotëm, në rrugën rajonale 71, në zonën e Riccios, pranë kufirit me rajonin e Umbrias.

Sipas burimeve zyrtare, Edmondi ndodhej në anë të rrugës, duke pritur një person që do ta shoqëronte për në punë, kur një makinë që kishte devijuar nga rruga e goditi për vdekje. Në timonin e mjetit ishte një 19-vjeçar, i cili sapo kishte marrë lejen e drejtimit.

Shkaqet e aksidentit nuk janë ende të qarta, por dyshohet se i riu humbi kontrollin e makinës, çka rezultoi fatale për Edmondin. Karabinierët e Cortonës kanë hapur hetimet për të përcaktuar saktësisht dinamikën dhe përgjegjësinë penale të ngjarjes.

Vdekja e 39-vjeçarit ka lënë të shokuar jo vetëm familjen, por edhe komunitetin shqiptar të zonës, ku ai njihej si një punëtor i ndershëm dhe prind i përkushtuar. Ai la pas bashkëshorten dhe vajzën e tij të mitur, që tashmë përballen me një humbje të pariparueshme.