Një shpërthim tragjik në një fabrikë fishekzjarresh ilegale në Itali ka marrë jetën e tre të rinjve, duke përfshirë 18-vjeçarin shqiptar Samuel Tafciu. Ngjarja e rëndë ndodhi mëngjesin e djeshëm, në ditën e parë të punës së viktimave në këtë fabrikë.

Mes viktimave ishin binjaket Sara dhe Aurora Esposito, 26 vjeçe, dhe Samuel Tafciu, një i ri me origjinë shqiptare, i cili ishte bërë baba vetëm katër muaj më parë. Sipas raportimeve të mediave italiane, magazina ku ndodhi shpërthimi ishte ngritur gjatë fundjavës dhe funksiononte pa autorizim nga autoritetet përkatëse.

Samueli, i cili jetonte në Ponticelli së bashku me bashkëshorten e tij 17-vjeçare dhe vajzën e tyre të vogël, punonte për të mbështetur familjen e tij. Ditën e djeshme, ai filloi punën e tij të re në fabrikën fatkeqe, por fati i tij mori fund tragjikisht.

Dëshmia e vjehrrës së viktimës

Anna Campagna, vjehrra e Samuelit, e tronditur nga ngjarja, foli për mediat italiane:
“Policia na thirri dhe ne vrapuam këtu menjëherë. Samueli ishte dhëndri im, i martuar me vajzën time 17-vjeçare. Ata kanë një vajzë 4 muajshe dhe ai punonte për të mbështetur gruan dhe fëmijën e tij. Ai ishte një djalë punëtor, kishte 10 vite në Itali dhe i kishte të gjitha kartat në rregull. Ai u dogj i gjallë, ishte dita e parë e punës,” tha ajo mes lotëve.

Campagna theksoi se tragjedia ka shkatërruar tre familje:

“Mbesa ime do të rritet pa babanë e saj dhe vajza ime, e cila është vetëm 17 vjeçe, tashmë ka një jetë të shkatërruar. Dy vajzat e tjera që humbën jetën ishin gjithashtu nëna beqare, që punonin për fëmijët e tyre të vegjël. Dhëndri im na telefonoi në orën 13:00 dhe na tha se po hanin një sanduiç. Vetëm një orë më pas ndodhi tragjedia. Tre familje të shkatërruara… kush do të na i kthejë fëmijët?” përfundoi ajo.

Ngjarja ka tronditur komunitetin në Itali, ndërsa autoritetet vazhdojnë hetimet për të zbardhur plotësisht rrethanat e shpërthimit dhe përgjegjësitë për funksionimin ilegal të fabrikës.