Një lajm i hidhur tronditi komunitetin e Korçës, teksa Edi Meçollari, një i ri me shpirt artisti dhe pjesë e Ansamblit “Skënderbeu”, ndërroi jetë papritur nga një arrest kardiak, duke lënë pas dhimbje të thellë në familjen, miqtë dhe të gjithë ata që e njohën.

Meçollari, i njohur për natyrën e tij të dashur, buzëqeshjen e përhershme dhe zemrën e madhe, ishte një figurë e dashur në komunitetin artistik të qytetit. Humbja e tij e papritur dhe në moshë të re është një plagë e madhe për ansamblin, bashkëpunëtorët dhe të gjithë ata që patën fatin të punojnë dhe të kalojnë kohë me të.

Miqtë dhe kolegët kanë ndarë mesazhe ngushëllimi dhe kujtime të ngrohta për Edi Meçollarin, duke e përshkruar atë si një djalë të veçantë, që la gjurmë me talentin dhe personalitetin e tij.

Ansambli “Skënderbeu” Korçë-Albania ka shprehur dhimbjen e thellë për largimin e parakohshëm të një prej anëtarëve të tij më të dashur, duke njoftuar për humbjen e një prej talenteve më premtuese të komunitetit artistik korçar.