Paros, Greqi – Një ngjarje e rëndë ka tronditur opinionin publik në Greqi. Një foshnjë vetëm pesë muajshe u transportua pa shenja jete në Qendrën Shëndetësore të ishullit të Parosit, të dielën pasdite. Pavarësisht përpjekjeve të mjekëve për ta ringjallur, vogëlushja u shpall zyrtarisht e vdekur.

Autoritetet greke kanë nisur një hetim penal për ngjarjen, e cila cilësohet me elementë të rëndë. Prindërit e foshnjës, një çift me origjinë shqiptare që jeton prej vitesh në ishull, janë arrestuar dhe akuzohen për “ekspozim fatal të një të mituri”.

Deklarata kontradiktore dhe dyshime të shumta

Ngjarja është shoqëruar me deklarata kontradiktore nga vetë prindërit. Nëna ka pohuar se foshnja kishte fjetur gjatë rrugës dhe ishte lënë në makinë, ndërsa pjesa tjetër e familjes ndodhej në plazh. Ndërkohë, babai ka deklaruar se kishin marrë vajzën me vete në det.

Një banor lokal, dëshmitar i pranishëm në zonën e plazhit Parasporos, tha për televizionin grek Star se familja kishte ardhur për pushime me katër fëmijët e tyre. Sipas tij, foshnja kishte rënë në gjumë në makinë, duke lënë të kuptohet se mund të jetë lënë e pashqetësuar për një kohë të gjatë në kushte të nxehta.

Autoritetet greke po shqyrtojnë disa pista hetimore, duke përfshirë mundësinë që foshnja të jetë lënë në automjet nën diell në temperatura të larta, ose që mund të ketë pasur ndonjë komplikacion shëndetësor në shtëpi apo në plazh.

Hetimet dhe autopsia

Policia ka marrë në pyetje dëshmitarë dhe po analizohen të dhënat ambientale dhe rrethanat në të cilat ndodhi tragjedia. Trupi i të miturës pritet t’i nënshtrohet autopsisë për të përcaktuar saktësisht shkakun e vdekjes.

Ndërkohë, çifti shqiptar pritet të dalë para Prokurorisë së Syrosit në ditët në vijim. Ngjarja ka shkaktuar reagime të forta në opinionin publik grek dhe ka ndezur debat për përgjegjësinë prindërore dhe sigurinë e fëmijëve në ambiente publike.