Një ngjarje e rëndë ka ndodhur të mërkurën pasdite në Romë, ku një studente amerikane humbi jetën pas një reaksioni alergjik të rëndë. Avarie Anne Tierney, 21 vjeç, ndodhej në zonën Pigneto në kryeqytetin italian, ku po ndiqte një kurs në kuadër të programit Erasmus, kur pësoi një shok anafilaktik pasi konsumoi një sanduiç në një restorant lokal.

Tierney ishte alergjike ndaj arrave shqeme dhe dyshohet se sanduiçi që konsumoi përmbante gjurmë të tyre. Menjëherë pas konsumimit, ajo u ndje keq dhe u rrëzua në tokë. Miqtë e saj, të cilët ndodheshin me të, arritën ta çonin në banesën e saj dhe i dhanë një dozë të medikamentit Bentelan për të ndihmuar në ndalimin e reaksionit.

Pavarësisht përpjekjeve të mjekëve që mbërritën në vendngjarje dhe aplikimit të masazhit kardiak dhe frymëmarrjes artificiale, e reja pësoi një infarkt dhe humbi jetën pak më vonë.

Sipas hetuesve, dyshohet se studentja nuk ka mundur t’i informojë kamerierët për alergjinë e saj, pasi nuk fliste italisht. Autoritetet po presin rezultatet e autopsisë për të konfirmuar shkakun e saktë të vdekjes.

Ngjarja ka tronditur komunitetin studentor në Romë dhe ka ngritur shqetësime mbi rëndësinë e komunikimit të alergjive ushqimore, sidomos për studentët ndërkombëtarë.