Një hotel në qendrën historike të Stambollit u evakuua pas një ngjarjeje tragjike, ku tre anëtarë të një familjeje turke, që jetonin në Gjermani dhe po kalonin pushimet në qytet, humbën jetën nga helmimi me pesticide. Katër anëtarët e familjes u sëmurën pas konsumimit të ushqimit të rrugës në zonën turistike të Ortakoy, në anën evropiane të Bosforit. Dy fëmijët, 3 dhe 6 vjeç, vdiqën të enjten, ndërsa nëna e tyre ndërroi jetë të premten, njoftoi Ministria e Drejtësisë.

Mediat raportojnë se helmimi mund të ketë ardhur nga midhjet e blera nga një shitës ambulant dhe patatet e mbushura që konsumoi familja. Restoranti ku kanë darkuar është mbyllur, ndërsa dy turistë të tjerë që qëndronin në të njëjtin hotel u shtruan në spital për të përziera dhe të vjella. Hetuesit zbuluan se një dhomë në katin përdhes të hotelit ishte spërkatur së fundmi me pesticide.

Policia ka arrestuar shtatë persona në lidhje me rastin, përfshirë një punonjës të hotelit dhe dy punonjës të kontrollit të dëmtuesve, ndërsa katër të tjerë ishin arrestuar më parë. Të gjithë mysafirët u transferuan në hotele të tjera, pa u bërë i ditur numri total i personave të prekur.

Ngjarja ka shkaktuar tmerr dhe tronditje në zonën turistike të Stambollit, ndërsa autoritetet po vijojnë hetimet për të sqaruar shkaqet e sakta të helmimit.