Një ngjarje e rëndë ka tronditur Turqinë mëngjesin e së martës, kur një zjarr shkatërrues përfshiu një hotel në qendrën e skive Kartalkaya, në provincën Bolu. Bilanci i tragjedisë është i rëndë: 66 persona kanë humbur jetën dhe 51 të tjerë janë plagosur.
Pamjet e kapura nga telefonat celularë tregojnë skena dramatike, me vizitorët që përpiqeshin të shpëtonin duke lidhur çarçafë për t’u ulur nga dritaret, ndërsa të tjerë bërtisnin për ndihmë. Guvernatori i provincës bëri të ditur se dy nga viktimat humbën jetën pasi u hodhën nga kati i lartë në panik.
Dëshmitarët përshkruajnë tmerrin e natës fatale
Baris Salgur, një punonjës i një hoteli aty pranë, rrëfeu momentet dramatike: “Pashë njerëz që bërtisnin nga dritaret. Para se të vinte zjarrfikësja, dy gra u hodhën nga lartësia.”
Ndërkohë, instruktori i skive, Nejmi Kepcetutan, tregoi se ndihmoi rreth 20 persona për t’u shpëtuar flakëve. Ai përshkroi sesi tymi i dendur ua vështirësonte njerëzve gjetjen e daljes së emergjencës.
Një tjetër dëshmitar, Ali Atmaja, tha se bashkë me të tjerë përpiqeshin të ndihmonin ata që hidheshin nga dritaret: “Vendosëm shtresa, por me gjithë përpjekjet tona, shumë jetë na humbën para syve.”
Hetimet dhe arrestimet e para
Menjëherë pas tragjedisë, Prokuroria e Bolus nisi një hetim të gjerë. Janë caktuar gjashtë prokurorë dhe një ekip ekspertësh për të përcaktuar shkakun e zjarrit. Deri tani, katër persona janë arrestuar, përfshirë pronarin e hotelit.
Presidenti Recep Tayyip Erdogan shprehu keqardhjen për ngjarjen dhe premtoi se hetimet do të vazhdojnë deri në zbardhjen e plotë të përgjegjësive.
Momenti fatal: 234 persona ndodheshin brenda hotelit
Zjarri ndodhi në kulmin e sezonit turistik, gjatë pushimeve shkollore, kur shumë familje kishin zgjedhur qendrën e skive për të kaluar kohën e lirë. Në momentin e tragjedisë, në hotel ndodheshin 234 persona.
Shkaku i saktë i zjarrit ende nuk është përcaktuar, por autoritetet turke po hetojnë nëse ka pasur shkelje të rregullave të sigurisë.
