Një aksident rrugor me përmasa tragjike ka ndodhur në Ugandë, ku dy autobusë u përplasën ballë për ballë, duke shkaktuar të paktën 63 viktima dhe një numër të lartë të plagosurish.
Ngjarja ndodhi pak pas mesnatës në autostradën që lidh kryeqytetin Kampala me qytetin verior të Gulu, një nga rrugët më të ngarkuara të vendit.

Sipas njoftimit të Forcës së Policisë së Ugandës, aksidenti ndodhi pasi të dy autobusët, që po udhëtonin nga drejtime të kundërta, u përpoqën të tejkalonin automjete të tjera – një kamion dhe një SUV – në të njëjtën kohë.
“Gjatë manovrës për parakalim, autobusët u përplasën kokë më kokë,” thuhet në deklaratën zyrtare të policisë, e publikuar në platformën X (ish-Twitter).

Autoritetet lokale kanë konfirmuar se të gjitha viktimat ishin pasagjerë në dy autobusët e përfshirë, ndërsa ekipet e shpëtimit po vijojnë punën për identifikimin e trupave dhe ndihmën ndaj të plagosurve.
Hetimet paraprake tregojnë se shpejtësia dhe manovrat e rrezikshme kanë qenë shkaku kryesor i përplasjes fatale.

Forcat e rendit kanë paralajmëruar se bilanci i viktimave mund të rritet, pasi disa nga të plagosurit ndodhen në gjendje kritike në spitalet e zonës.