Ministria për Evropën dhe Punët e Jashtme e Shqipërisë (MEPJ) ka reaguar sot pas tragjedisë ajrore që ndodhi në Washington DC, SHBA. Nëpërmjet një deklarate në rrjetin social X, MEPJ shprehu pikëllimin e thellë për ngjarjen e rëndë dhe ofroi ngushëllimet e saj për të prekurit.

“Tragjedia rrëqethëse në Washington DC na ka lënë thellësisht të pikëlluar,” thuhet në deklaratën e Ministrisë. Ajo shton se “ngushëllimet tona më të sinqerta dhe solidariteti ynë shkojnë për familjet e prekura, popullin amerikan dhe qeverinë pas këtij aksidenti ajror tragjik. Mendimet tona janë me viktimat dhe të gjithë ata që janë prekur nga kjo ngjarje shkatërruese.”

Fluturimi 5342 i “American Airlines” po udhëtonte nga Wichita, Kansas për në aeroportin kombëtar “Ronald Reagan” të Washingtonit, kur u përplas me një helikopter ushtarak teksa po i afrohej pistës pak para orës 21:00 të së mërkurës (02:00 GMT të enjten). Ngjarja tragjike ka lënë të vdekur të gjithë 64 pasagjerët në bordin e avionit dhe tre ushtarët në bordin e helikopterit të ushtrisë amerikane.

Ky aksident ka shkaktuar trishtim të thellë, dhe autoritetet amerikane po vazhdojnë hetimet për të zbardhur rrethanat e plota të ngjarjes.