Detaje të reja janë zbardhur në lidhje me ngjarjen e rëndë të ndodhur këtë pasdite në Shëngjin, ku një punëtor humbi jetën teksa ishte duke punuar për ndërtimin e një skene koncerti në shëtitoren pranë bustit “Willson”.

Viktima është identifikuar si Zef Lorenci, 32 vjeç, i cili raportohet se ka rënë në kontakt me energjinë elektrike gjatë punës. Sipas burimeve nga vendngjarja, pas goditjes elektrike ai ka humbur ekuilibrin dhe ka rënë nga skela, duke pësuar plagë të rënda që i morën jetën në vend.

Ngjarja e rëndë ka ndodhur rreth orës 16:45. Pamjet nga vendi i ngjarjes tregojnë se zona është rrethuar me shirita sigurie, ndërsa autoritetet kanë nisur hetimet për të zbardhur shkaqet dhe rrethanat e plota të aksidentit tragjik.

Ende nuk ka një reagim zyrtar nga organizatorët e eventit apo autoritetet lokale në lidhje me masat e sigurisë që ishin marrë për ndërtimin e skenës. Dyshohet se mungesa e kushteve të duhura teknike dhe mungesa e mbrojtjes elektrike mund të kenë qenë shkaktarët e aksidentit fatal.