Një studim i ri i publikuar në revistën Science Signaling ka zbuluar lidhjen mes goditjeve të shpeshta në kokë dhe rritjes së rrezikut për zhvillimin e sëmundjeve si Alzheimer dhe Parkinson më vonë gjatë jetës. Sipas studiuesve, goditjet e shumta, sidomos ato që ndodhin gjatë fëmijërisë ose në sporte të tilla si futbolli dhe boksi, mund të kenë një ndikim të madh në shëndetin mendor.

Studiuesit kanë theksuar se këto goditje mund të rizgjojnë viruse që janë të fjetura në trupin e njeriut, si virusi i herpesit, i cili mund të fshihet në tru në 95% të individëve. Kur ky virus aktivizohet, mund të shkaktojë inflamacione dhe dëmtime qelizore, duke hapur kështu rrugën për zhvillimin e sëmundjeve degjenerative të trurit.

Për të studiuar këtë fenomen, kërkuesit përdorën një model eksperimentimi në laborator, ku aktivizuan një virus të fjetur. Rezultatet ishin alarmante, pasi u vërejt se pas disa javësh ky aktivizim shkaktoi reagime dhe simptoma të ngjashme me ato të Alzheimer, duke përfshirë inflamacione të zgjeruara dhe vdekjen e neuroneve.

Ky studim sjell një kërcënim të ri për ata që janë të ekspozuar ndaj goditjeve të shpeshta në kokë, duke theksuar nevojën për më shumë masa mbrojtëse dhe ndërgjegjësim në lidhje me efektet afatgjata të traumave cerebrale.