Presidenti i SHBA, Donald Trump, ka njoftuar se ka kërkuar nga Elon Musk dhe kompanisë së tij SpaceX që të sjellin sa më shpejt astronautët e NASA-s, Butch Wilmore dhe Sunny Williams, që aktualisht ndodhen në Stacionin Ndërkombëtar Hapësinor (ISS).
Në një postim në rrjetin social Truth Social, Trump theksoi: “Kam kërkuar nga Elon Musk dhe SpaceX që të sjellin dy astronautët e guximshëm që praktikisht u braktisën në hapësirë nga administrata e Biden. Elon do të jetë në rrugën e tij së shpejti. Shpresoj se gjithçka do të jetë e sigurt. Fat i mirë.”
Kërkesa e Trump për t’i kthyer astronautët sa më shpejt të jetë e mundur ka tërhequr vëmendjen, pasi është një ndërhyrje e pazakontë nga presidenti amerikan në operacionet e NASA-s. Astronautët Wilmore dhe Williams ishin planifikuar të ktheheshin në gusht, por misioni i tyre është vonuar për shkak të problemeve me anijen kozmike Boeing Starliner.
Pas shqyrtimit të sigurisë, NASA ka kërkuar nga SpaceX që të kthejë astronautët në Tokë, pasi Starliner u konsiderua i pasigurt për kthimin e tyre. Sipas NASA-s, astronautët janë në gjendje të mirë shëndetësore, por ende nuk është sqaruar data e saktë kur ata do të kthehen.
