Ukraina kaloi një tjetër natë ankthi, pasi negociatat mes Donald Trump dhe Vladimir Putin nuk sollën asnjë përparim të prekshëm për armëpushim, por prodhuan mesazhe që tingëlluan si kërcënime të drejtpërdrejta ndaj Kievit dhe aleatëve evropianë.

Trump, i dukshëm i lodhur dhe i zhgënjyer pas takimit, nuk arriti të shpallte ndonjë marrëveshje madhore, ndërsa Putini u shfaq i patrembur, duke paralajmëruar publikisht që Ukraina dhe kryeqytetet e NATO-s të mos përpiqen të prishin procesin.

“Ne presim që Kievi dhe kryeqytetet evropiane ta perceptojnë këtë në mënyrë konstruktive dhe të mos krijojnë pengesa, të mos bëjnë përpjekje për të prishur progresin që po shfaqet përmes provokimeve dhe makinacioneve prapa skenave,” tha kreu i Kremlinit.

Takimi nuk përfundoi as me një darkë mes dy liderëve – një shenjë se palët mbeten larg dakordësisë. Trump pranoi se disa “çështje të mëdha” si territori i pushtuar dhe armëpushimi mbeten të pazgjidhura.

Megjithatë, Putin doli me dy fitore simbolike. E para, një rehabilitim i paprecedentë imazhi: pritja me tapet të kuq në SHBA dhe udhëtimi në “Bishën” presidenciale të Trump-it. Një pamje e tmerrshme për shumë ukrainas, të cilët e panë agresorin që ka vrarë civilë për tre vjet e gjysmë, duke u trajtuar si një lider legjitim që madje e quajti Ukrainën një “komb vëllazëror”.

Fitorja e dytë ishte koha. Kremlini fitoi më shumë hapësirë për ofensivën e tij verore, ndërsa Trump nuk tregoi vendosmëri për sanksione të reja. Putin sugjeroi takime të tjera, duke lënë të kuptohet se nuk ka nxitim.

Në fund, Ukraina u zgjua në një realitet të pandryshuar – një realitet të hidhur, ku lufta vazhdon, Putini fiton kohë dhe SHBA-ja nuk ofron garanci të reja vendimtare.