Një imazh viral i Donald Trump të veshur si Papa ka nxitur reagime dhe humor në rrjet, duke shkaktuar edhe pyetje direkte ndaj vetë ish-presidentit amerikan. Në një intervistë të fundit, Trump është pyetur për këtë fotografi që ka qarkulluar gjerësisht në mediat sociale dhe ka ngjallur kureshtje në mbarë botën.

“Nuk kisha të bëja fare me të,” u shpreh republikani. “Dikush më bëri një foto të veshur si Papa dhe e publikoi në internet. Nuk jam unë që e bëra, nuk kam idenë nga erdhi. Ndoshta ishte inteligjenca artificiale. Nuk di asgjë për këtë… në fakt, gruaja ime mendonte se ishte e lezetshme.”

Trump shtoi me humor se “katolikët e adhuronin” këtë foto, ndërsa e la të hapur idenë se mund të jetë krijuar nga ndonjë teknologji AI, për të cilën ai nuk ishte i informuar.

Kujtojmë se vetëm disa ditë më parë, ish-presidenti ishte pyetur në një intervistë tjetër për opinionin e tij mbi përzgjedhjen e një Papa të ri, ku në stilin e tij karakteristik, ai u përgjigj se “do donte të ishte vetë”.

Fotografia në fjalë, ku Trump shihet me një mantel të bardhë, kurorë papnore dhe një sfond madhështor, u komentua gjerësisht si një krijim nga inteligjenca artificiale – një fenomen që po bëhet gjithnjë e më i zakonshëm në rrjetet sociale, duke ngatërruar shpesh edhe realitetin me imagjinatën digjitale.

Ndërsa fotoja mund të jetë një shaka dixhitale, reagimi i Trump dhe mënyra se si ai përqafon vëmendjen – edhe kur bëhet fjalë për rolin më të lartë të Kishës Katolike – tregon edhe një herë lidhjen e tij të pandarë me spektaklin mediatik.