Donald Trump ka njoftuar se do të kërkojë 1 miliard dollarë dëmshpërblim nga Universiteti i Harvardit, duke e çuar në një nivel të ri përplasjen e vazhdueshme mes administratës së tij dhe një prej institucioneve më prestigjioze akademike në SHBA, raporton BBC.

Deklarata e Trump vjen pas një raportimi të New York Times, sipas të cilit administrata e presidentit amerikan ishte detyruar të tërhiqej nga kërkesa fillestare për një pagesë prej 200 milionë dollarësh gjatë negociatave me universitetin. Trump iu referua këtij artikulli në një postim në rrjetin social Truth Social, ku akuzoi Harvardin se po i “ushqen New York Times-it shumë marrëzira”.

Administrata Trump e ka akuzuar Harvardin se nuk ka bërë sa duhet për të luftuar antisemitizmin gjatë protestave pro-palestineze në kampus, akuza që universiteti i ka mohuar kategorikisht. Harvardi është shndërruar në një nga objektivat kryesore të fushatës së Shtëpisë së Bardhë kundër asaj që ajo e cilëson si ideologji “woke” dhe “radikale të majta” në universitetet amerikane.

Në prill të vitit të kaluar, Trump revokoi rreth 2 miliardë dollarë fonde kërkimore për Harvardin dhe ngriti financimet federale. Universiteti reagoi duke paditur administratën, duke deklaruar se asnjë qeveri “nuk duhet të diktojë se çfarë mund të mësojnë universitetet private, kë mund të pranojnë dhe punësojnë, apo cilat fusha studimi dhe kërkimi mund të ndjekin”.

Një gjykatë federale amerikane më pas rrëzoi këto shkurtime miliarda dollarëshe, duke vendosur se qeveria kishte shkelur të drejtat e Harvardit për lirinë e shprehjes. Shtëpia e Bardhë e cilësoi vendimin si “të tmerrshëm” dhe u zotua ta kundërshtojë, duke deklaruar se Harvardi mbetet “i papërshtatshëm për grante në të ardhmen”.

Përpara njoftimit të fundit, qeveria kishte qenë në bisedime me Harvardin për një marrëveshje të mundshme që do të zhbllokonte fondet federale. Por Trump duket se ka përjashtuar çdo kompromis, duke deklaruar: “Tani po kërkojmë një miliard dollarë dëmshpërblim dhe nuk duam të kemi asnjë lidhje tjetër në të ardhmen me Universitetin e Harvardit”.

Ai pranoi se beson se Harvardi ka kryer “paligjshmëri serioze dhe të rënda”, pa dhënë detaje konkrete mbi shkeljet e pretenduara. Trump ka kërcënuar më herët edhe me heqjen e statusit të përjashtimit nga taksat për universitetin, si dhe me marrjen nën kontroll të patentave që burojnë nga kërkime të financuara me fonde federale.

Ndërkohë, tre universitete të tjera të Ivy League – Columbia, Penn dhe Brown – kanë arritur marrëveshje me administratën Trump për të ruajtur financimet federale që rrezikoheshin, duke zgjedhur kompromisin në vend të përballjes gjyqësore. Përplasja me Harvardin, megjithatë, duket se është larg përfundimit.