Presidenti amerikan, Donald Trump, ka deklaruar se SHBA do të përballet me një katastrofë të sigurisë kombëtare nëse tarifat që ai vendosi këtë vit ndaj shumicës së partnerëve tregtarë shpallen të paligjshme nga Gjykata e Lartë.

Trump nisi fushatën e tarifave në prill, duke akuzuar partnerët tregtarë për krijimin e çekuilibrave të padrejta dhe duke i përshkruar tarifat si një masë reciproke, bazuar në Aktin Ndërkombëtar të Fuqive Ekonomike të Emergjencës (IEEPA) të vitit 1977. Ky akt i jep presidentit të drejtën të rregullojë ose bllokojë tregtinë ndërkombëtare gjatë një emergjence kombëtare që përfshin kërcënime të huaja.

Megjithatë, Gjykata e Apelit vendosi më vonë se Trump kishte tejkaluar autoritetin e tij, duke theksuar se vetëm Kongresi mund të autorizojë masa gjithëpërfshirëse si tarifat. Vendimi i tarifave nuk u anulua menjëherë, duke u lënë në pritje të një vendimi përfundimtar nga Gjykata Supreme.

Në një postim në Truth Social, Trump paralajmëroi për pasoja të rënda ekonomike: “Shuma aktuale që do të na duhej të paguanim mbrapsht nga tarifat dhe investimet do të ishte mbi 2 trilionë dollarë, dhe kjo, në vetvete, do të ishte një katastrofë e sigurisë kombëtare.” Ai nuk dha detaje për mënyrën se si arriti këtë shifër, ndërsa zyrtarët tregtarë kanë vlerësuar që tarifat deri tani kanë gjeneruar rreth 100 miliardë dollarë.

Gjatë argumenteve gojore në Gjykatën Supreme, disa gjyqtarë vunë në dyshim autoritetin e Trump për të vendosur tarifa sipas IEEPA-s, por disa e lidhën aktin me mundësinë për të rregulluar importet me licenca, që ekonomikisht mund të konsiderohen të krahasueshme me tarifat. Gjyqtarja Amy Coney Barrett paralajmëroi se një vendim për të përmbysur tarifat mund të krijonte një “rrëmujë” për gjykatat e ngarkuara me rimbursimin e importuesve.

Kjo çështje është ndjekur me vëmendje të madhe, pasi rezultati i vendimit të Gjykatës Supreme mund të ketë ndikim të drejtpërdrejtë mbi politikën tregtare dhe ekonominë e SHBA-së.