Presidenti amerikan Donald Trump deklaroi se Vladimir Putin ka rënë dakord të pranojë garanci sigurie për Ukrainën, duke hapur një kapitull të ri në diskutimet mbi fundin e luftës.

“Besoj se Presidenti Putin ka rënë dakord që Rusia të pranojë garanci sigurie për Ukrainën,” tha Trump gjatë një konference me gazetarët në Shtëpinë e Bardhë.

Kreu i Shtëpisë së Bardhë theksoi se Europa do të mbajë një pjesë të madhe të barrës për sigurinë dhe rindërtimin e Ukrainës:

“Ne do t’i ndihmojmë dhe do ta bëjmë këtë shumë të sigurt,” shtoi ai.

Trump nënvizoi se një nga çështjet kryesore të bisedimeve me liderët evropianë në Uashington është ndarja e përgjegjësive:

“Duhet të diskutojmë gjithashtu mundësinë e shkëmbimeve territoriale,” tha presidenti amerikan, duke lënë të hapur një skenar delikat për të ardhmen e kufijve të Ukrainës.

Ai bëri gjithashtu të ditur synimin për të organizuar një takim trilateral me Zelensky-n dhe Putinin, duke e parë këtë si një hap vendimtar për paqen.

Deklarata e Trump pritet të shkaktojë reagime të forta, pasi çështja e integritetit territorial të Ukrainës mbetet një vijë e kuqe për Kievin dhe shumicën e aleatëve perëndimorë.