Republikani Donald Trump ka shpallur fitoren në garën presidenciale në SHBA kundër rivales demokrate Kamala Harris, gjë që mund ta kthejë në Shtëpinë e Bardhë pas katër vjetësh. Liderë të ndryshëm botërorë kanë përcjellë urimet e tyre për Trumpin, megjithëse procesi i numërimit të votave elektorale ende nuk ka përfunduar.

Kryeministri i Izraelit, Benjamin Netanyahu, shprehu mbështetjen e tij duke thënë: “Urime për rikthimin më të madh të historisë! Rikthimi juaj historik në Shtëpinë e Bardhë ofron një fillim të ri për Amerikën dhe një riangazhim të fuqishëm ndaj aleancës së madhe midis Izraelit dhe Amerikës.”

Ndërkohë, kryeministri hungarez, Viktor Orban, e cilësoi fitoren e shpallur si “rikthimi më i madh në historinë politike të SHBA-së,” duke uruar Trumpin për këtë “fitore shumë të nevojshme për botën.”

Edhe kryeministri i Shqipërisë, Edi Rama, shprehu mirënjohjen për bashkëpunimin me administratën e mëparshme dhe pritshmëritë për partneritetin e ri. “Ishte një nder i vërtetë të punoja së bashku me Presidentin e 46-të të Shteteve të Bashkuara për të forcuar lidhjen midis dy vendeve tona. Mezi pres privilegjin e madh të punoj me Presidentin e 47-të për të përmirësuar më tej partneritetin tonë për paqe, prosperitet dhe përparim të mëtejshëm,” shkruan Rama.

Po ashtu, presidenti serb Aleksandar Vuçiç dhe presidentja e Kosovës, Vjosa Osmani, kanë përcjellë urimet e tyre për Trumpin.

Aktualisht, Trump ka 266 vota elektorale nga 270 të nevojshme për të konfirmuar fitoren, ndërsa Kamala Harris numëron 219 vota elektorale, duke lënë ende të papërcaktuar rezultatin zyrtar.