Presidenti amerikan, Donald Trump, njoftoi të dielën se ka marrë vendimin për emrin që do të propozojë si kreun e ardhshëm të Rezervës Federale (Fed). Përpara gazetarëve në bordin e Air Force One, gjatë kthimit për në Uashington, Trump tha:
“E di kë do të zgjedh, po. Do ta bëjmë publik së shpejti.”
Megjithatë, presidenti nuk zbuloi ende identitetin e kandidatit. Trump ka kritikuar shpesh drejtuesin aktual të Fed-it, Jerome Powell, për mosuljen e shpejtë të normave të interesit, duke kërkuar një drejtues që të ndjekë më agresivisht politikat lehtësuese.
Sipas raportimeve të Bloomberg, kandidati më i mundshëm është Kevin Hassett, drejtori i Këshillit Ekonomik Kombëtar në Shtëpinë e Bardhë dhe këshilltar ekonomik i lartë i Trump. Një emër i cili, sipas pritshmërive të presidentit, do të sigurojë ulje të normave të interesit dhe stimuj të rinj për ekonominë amerikane.
