Pas rezultateve zhgënjyese të republikanëve në zgjedhjet lokale të së martës, përfshirë fitoren historike të Zohran Mamdanit në Nju Jork, Donald Trump reagoi me tone mbrojtëse, duke u përpjekur të distancohet nga humbjet e partisë së tij. Në një postim në Truth Social, Trump shkroi:

“Trumpi nuk ishte në fletëvotimi dhe mbyllja e qeverisë ishin dy arsyet pse republikanët i humbën zgjedhjet sonte.”

Ai ia atribuoi humbjet faktorëve të jashtëm, përfshirë mbylljen përkohshme të qeverisë federale dhe mungesën e tij në garat lokale. Trump kishte ndërhyrë personalisht në disa gara, përfshirë ato në New Jersey dhe Virxhinia, ku kishte mbështetur Jack Ciattarelli dhe Winsome Earl-Sears, të cilët gjithashtu pësuan humbje. Një ditë para zgjedhjeve, ai u kishte bërë thirrje mbështetësve të votonin ish-guvernatorin Andrew Cuomo në vend të demokratit Zohran Mamdani dhe kandidatit republikan Curtis Sliwa në garën për kryebashkiakun e Nju Jorkut.

Megjithatë, përpjekjet e tij rezultuan të kota: Mamdani triumfoi, ndërsa të gjithë kandidatët e mbështetur nga Trump humbën garat e tyre.

Pas humbjeve, ish-presidenti tentoi të zhvendosë vëmendjen drejt një lajmi më të favorshëm për të, duke theksuar se intervista e tij në “60 Minutes” kishte shikueshmërinë më të lartë në vite.

Analistët politikë e kanë cilësuar reagimin e Trump si një përpjekje për të shmangur përgjegjësinë pas një serie dështimesh elektorale, që tregojnë dobësim të ndikimit të tij politik në skenën republikane.