Ibiza, Spanjë – Një seri zbulimesh tronditëse ka alarmuar autoritetet në një prej destinacioneve më të njohura turistike të Spanjës. Policia dhe Garda Civile kanë gjetur të paktën pesë trupa të pajetë me duar dhe këmbë të lidhura në ujërat e Ishujve Balearik, kryesisht pranë Ibizës dhe Formenterës, gjatë muajit të fundit.

Sipas burimeve zyrtare, trupat dyshohet t’u përkasin emigrantëve, që po përpiqeshin të mbërrinin në bregdetin spanjoll përmes rrugëve të rrezikshme nga Algjeria. Por, ndryshe nga rastet e zakonshme të mbytjeve tragjike, këto kufoma janë gjetur të prangosura, çka ka çuar në dyshime serioze për vrasje të qëllimshme.

“Pozicioni i trupave dhe fakti që kishin të lidhura gjymtyrët e tyre na bën të besojmë se nuk bëhet fjalë për një aksident detar”, deklaroi një zëdhënës i Gardës Civile, duke shtuar se hetimi është në fazë të avancuar, por pa dhënë detaje të mëtejshme për publikun.

Zbulimet janë bërë në fazë të ndryshme gjatë javëve të fundit, ndërsa policia ka ruajtur një qëndrim hermetik për hetimet që po zhvillohen. Kufomat janë gjetur si në det, ashtu edhe në plazhe të izoluara, me të njëjtin model të lidhjeve dhe të gjitha pa dokumente identifikimi.

Sipas hetimeve të para, të gjithë viktimat udhëtonin me një mjet lundrues, dhe pista kryesore e hetimit është se kanë qenë emigrantë të paligjshëm, por rrethanat e vdekjes dhe prangosja e tyre lë të hapur dyshimet për trafik njerëzor, likuidime ose veprime kriminale të organizuara.

Autoritetet lokale dhe qendrore në Spanjë kanë shtuar kontrollet detare dhe kanë kërkuar bashkëpunim ndërkombëtar për të identifikuar rrjetet që mund të qëndrojnë pas kësaj ngjarjeje tragjike.

Hetimet mbeten të hapura, ndërsa policia u bën thirrje qytetarëve dhe dëshmitarëve të mundshëm të ndajnë çdo informacion të vlefshëm që mund të ndihmojë në zbardhjen e rastit.