Raportohet se ushtarët e parë nga Koreja e Veriut kanë mbërritur tashmë në Ukrainë për të luftuar në krah të trupave ruse, pas një marrëveshjeje të arritur mes Kim Jong Un dhe Kremlinit. Ministria e Jashtme e Koresë së Veriut ka deklaruar publikisht mbështetjen e saj për Rusinë, duke theksuar se Pheniani do ta mbështesë Moskën deri në arritjen e fitores në Ukrainë. Sipas burimeve, Koreja e Veriut mund të ketë dërguar rreth 10-12 mijë ushtarë për të përforcuar përpjekjet ushtarake ruse, si dhe raketa të ndryshme.
Kjo marrëveshje e papritur ka sjellë shqetësime në bllokun perëndimor, ku SHBA dhe BE kanë nisur hetime për të kuptuar nëse Kina ishte e informuar për këtë lëvizje. Në reagimin e parë, Kina ka deklaruar se nuk kishte dijeni për këtë partneritet të ri, por shumë vëzhgues ndërkombëtarë kanë shprehur dyshime për versionin zyrtar të Pekinit. Kina, aleate e fortë e Koresë së Veriut, mbështet Phenianin ekonomikisht dhe strategjikisht, çka ngre pyetje mbi mundësinë e përfshirjes së saj të heshtur në këtë marrëveshje.
Mathieu Boulegue, një studiues në Qendrën për Analizën e Politikave Evropiane (CEPA), shpreh skepticizmin e tij për pavarësinë e Phenianit në këtë vendim, duke argumentuar se Kina është aleati kyç i Koresë së Veriut dhe mund të ketë ndikuar në vendimin e saj për të përkrahur Rusinë.
