Ministri i Jashtëm turk, Hakan Fidan, ka deklaruar se Turqia arriti të bindë Rusinë dhe Iranin që të mos ndërhyjnë ushtarakisht gjatë ofensivës rebele dhe xhihadiste që çoi në rënien e regjimit të Bashar al-Asad në Siri.

“Gjëja më e rëndësishme ishte të bisedonim me rusët dhe iranianët dhe të siguroheshim që ata të mos ndërhynin ushtarakisht në ekuacion. Ne folëm me rusët dhe iranianët, dhe ata e kuptuan,” tha Fidan në një deklaratë.

Ai theksoi se objektivi kryesor i negociatave ishte shmangia e gjakderdhjes dhe minimizimi i humbjeve njerëzore, duke theksuar rëndësinë e dialogut me dy aktorë të fuqishëm që kanë ndikim të madh në konfliktin sirian.

“Për të pasur sa më pak humbje të jetëve njerëzore, ne u përpoqëm ta bënim pa gjakderdhje, duke vazhduar negociatat e synuara me dy aktorë të rëndësishëm, të aftë për të përdorur fuqinë e tyre,” shtoi ai.

Kjo qasje diplomatike e Turqisë duket se luajti një rol kyç në ndryshimin e situatës gjeopolitike në Siri dhe në rënien e regjimit të Asadit, duke shmangur përshkallëzimin e konfliktit përmes ndërhyrjeve të huaja.